بسم الله الرحمن الرحيم
(1)
ريجيم آخر زمن
كان يا ما كان فى قديم الزمان...كان فيه زوجين
حنفى....وفوزيه
وفى يوم من اليومين دول....وبينما حنفى يجلس هادئا مشاهدا للمسلسل اليومى
دخلت عليه فوزيه...وهى شايله الصنيه...وحدث الآتى
فوزيه: حنفى....حنفى
حنفى :أيوه يا فوزيه
فوزيه: بتشوف ايه؟
حنفى: التمثيليه يا حياتى اللى انت بتحبيها
فوزيه: يا سلاام....ومن امتى؟ اشمعنى المسلسل ده متابعه قوى..واللا يعنى علشان لهلوبه اللعوبه بتمثل فيه
حنفى: وآدى المسلسل يا ستى ...هه.....آدى الجزيره
فوزيه: آه....أصلك معجب بالمذيعه دى...ما أنا فاهماك كويس
حنفى: وآدى الجزيره....هه....نشوف أسامه السيد. ..طبخ وفن
فوزيه: ليه...هو أكلى ما بيعجبش واللا ايه
حنفى: أفففف...أنا داخل أنام
فوزيه: طبعا...مش عاوز تقعد معاى...وأنا شقيانه طول النهار
ودخل شهر زاد...قصدى حنفى ينام...وأنفردت فوزيه بالتليفزيون...وأطبقت بقبضتها على التليفون...ودق جرس الهاتف بدلال عند سنيه...والتى جرت وتركت الكنافه على الطبليه...وجاء صوتها الرنان...والذى يبعث بالأمان
سنيه:ألووووووووو
فوزيه: أيوه يا سنسن...الحقينى يا اختى
سنيه: خير يا فوفو....قلقتينى
فوزيه: حنفى...حنفى يا سنيه....مش مهتم بيه...وطول الليل يبحلق فى الممثلات. ..والمذيعات
سنيه: معلش يا ختى...ما تزعليش نفسك...بس الصراحه عنده حق
فوزيه: ايه....بتقولى ايه
سنيه: ما تزعليش ...انت عارفانى...أنا صريحه واللى فى قلبى على لسانى
فوزيه: أيوه...ما أنا عارفه لسانك...كملى
سنيه:أصلك طخنتى قوى...وبقيتى كبشه ...وانت شايفه بنات اليومين دول عاملين ايه فى نفسهم...ولازم يا ختى تخسى...وتبقى من صناع الحياه. ...وكمان تساعدى جوزك المحروس حنفى انه يغض بصره لما يلاقيكى حلوه...ونقرب من ربنا...واللا الحجاب والعبايه اللى احنا لابسينهم دول مالهمش لازمه يا فوزيه
فوزيه: والله عندك حق...طب أعمل ايه....مش قادره أعمل ريجيم
سنيه: أنا حا أساعدك..وأروح معاك صالة الجيم اللى على ناصية الحاره...وأهو نشجع بعض
فوزيه: ماشى....يا رب أخس يا رب
ومر ت الليله...وفى الصباح وبعد أن انتهت فوزيه من المطبخ والتقليه...اتجهت لصديقتها سنيه...وانطلقا فورا للصاله اللولبيه
سنيه: شفتى يا فوزيه...كام واحده تخينه...مش انت لوحدك..نطى ياختى نطى
فوزيه: أيوه يا سنيه...شوفى دى...مكعبره..واللا دى...واللا دى..هب..هب.
سنيه: شفتى دى لابسه بنطلون حلو قوى...يا ترى منين؟
فوزيه: لا...للللللا....بصى وشوفى اللى بتنط قدامك...والحلق اللى بينط فى ودنها....واللا الغوايش...نطى ياختى نطى
سنيه: آه يا دماغى...جالى صداع...مش قادره
فوزيه: لا...لازم نكون أقوى من كده....زى الطويله اللى هناك دى...شفتى ياختى رايحه جايه ازاى...تلاقي عندها خدامه...ولا بيتهد حيلها فى الغسيل ولا حاجه
سنيه: بأقول لك ايه...تيجى نتعرف بيهم...وأهو نعرف بيخيطوا عباياتهم فين
فوزيه: فكره والله
ومرت الأيام....وفوزيه مستمره...وسنيه أيضا مستمره...والحال كما هو عليه
وفى ليلة أخرى من تلك الليالى المستخبيه
فوزيه: حنفى....حنفنف
حنفى: أيوه يا أم سحلب
فوزيه: قلت لك ميت مره ما تقوليش كده
حنفى: الله....مش ابنك
فوزيه: ما انت اللى اخترت اسمه. ....قولى يا فيفى
حنفى :حاضر يا فيفى...خير؟
فوزيه: ايه رأيك...مش خسيت؟
حنفى: هو فين ده....ده انت بقالك شهر رايحه جايه وبتصرفى أد كده...ولسه برده البضاعه كاملة الدسم
فوزيه: كده...سديت نفسى....الله يسامحك...أصلك مش بتشجعنى
حنفى: لا...لالالا يا حياتى...ده أنا نفسى تخسى...وتحت أمرك
فوزيه: طب ايدك على خومسوميت جنيه
حنفى: ليه...
فوزيه: حا أشترى ترينينج...وشوز رياضى...وشراب فوشيا...واستريتش بمبى...وتيشيرت أخضر...وتوكه لون الشورااااااب...وسكر للريجيم...ومربى للريجيم...ودايت بيبسى...وأيس كريم دايت...وعشره كيلو تفاح...وخمسه كيلو جريب فرووووووت..وعبايتين جداد من محلات ((المتحجبه التيفه))أروح بيهم ياخويا...أصلك ما شفتش الستات لابسين ايه
وانتهت الليله....وتشاجر حنفى وفوزيه0..بسبب الميزانيه...
وأكيد انتصرت فوزيه...
وبعد عشر سنوات
أن أن أاااااا
فوزيه: حنفى...أنا نازله عندى تمرين..لزوم الريجيم. .عاوز حاجه
حنفى: ريجيم...قال ريجيم قال
فوزيه: بتقول ايه
حنفى: لا يا حياتى...مع ألف سلامه
سحلب:بابا....مش كفايه بقى. ...بقى لك ساعه بتتفرج على الأغنيه دى ...وحولتنى من القناة دى لدى وراها وراها
حنفى: سحلب...وبعدين....أمال نعمل ايه لحد ما ماما ترجع؟؟
وانت عارف ما فيش فلوس عشان نخرج. ..ماما اللى ماسكه الميزانيه
سحلب: يوووووووووه....الجزيره تانى
حنفى: بأشوف النشره يا ولد
الثلاثاء يوليو 08, 2008 1:26 am
انا كمان ما بحب هيك نسوان
